Sta curta considerassion piena de frasi fate, la dedico a tuti queli che ga pressa de desbratarse del vecioto che ga in casa....la me ze vegù cativa ma ze giusto che la sia scrita cussì.......

UN INTRIGO
"Ecolo qua el vecio: novanta do ani, imobilizà su un caregoto, mèso rincojonìo, tuto el dì drio predicare e a prètendare.
Ecolo qua sto intrigo, da menare in cesso, da lavare, da mètare in leto....ormai ghe vòe uno sempre drio, perso tuto par lu.
E almanco el te dasesse qualche sodisfassion, che sò, che el ne ringrassiasse! Machè, tuto el giorno drio lamentarse, drio lagnarse che el ga male de qua, male de là.
Si va ben, el ga na bona pension....sì el ga anca l'aconpagnatoria....sèrto un milion e mèso al mese...sicuro che ne fa comodo!...ma la savesse cara, che vita che semo drio fare...e...ma no sò quanto che la pòe durare: un ano, do...e se el vive n'altri sete, oto ani? se pensela che rassa de inferno? se fa presto dire che bisogna 'ndarghe drio ai ansiani, ma bisogna provare!....la casa de riposo?....ma sala, cossa che la costa ogni mese? Averli in casa, cara.....ah, no mi preferisso morire pì zòvane sensa dare tuto sto disturbo a me fioli par carità"
Parole che sentimo un pòco dapartuto, frasi fate, fruto de na società che ga senpre pì pressa che promove la zente ativa, che se dà da fare, che ze indipendente.Frasi piene de bon senso pratico che vien fòra anca da boche de persone che tute le domèneghe va in ciesa, dove magari qualcuna ghe insegna catechismo anca a to fioli, da fèmene che ga na cariera, un marìo e le ferie da fare.Che vien fòra da le stesse boche che ga pena condanà la guera in Kosovo, che comenta co comossìon l'ùltima puntata de la telenovela del momento o le vacade de Rafaela Carà. Tute persone che quando se cata co i amissi sa dire robe belissime,fare discorsi de alta umanità, che magari se despera o cria par el cagneto sbandonà o par el panda che, poarin de Dio, ze drio estinguarse.
Ecoli qua: i ze lori i veci de doman: persone che se augura, fin che le ze zòvani, e la morte la pensa distante, de morire prima de deventare come so pare o so mare: "veci e rincojonii", par usar le so parole.
Pecà che Dio no senpre ga rece e voja de scoltare e contentare tuti.Cussì qualchedun de sti ipotetici benefatori de la futura generassion finirà in un caregoto a fare la vergognosa fine che ghe ga fato fare a so pare o so nono: morire solo e desmentegà parchè, come che dise un vecio, ma sagio proverbio: " Chi sèmena vento tira sù tempesta"

------pensiero--------