Setembre


La prima piova cambia la stajon,
el caldo se ritìra pian pianelo
e la frescùra viaja in procession
descadenando nuvoloni in cielo.

Xe presto ancòra e le malinconìe
che farà scola nel vissin autuno,
se mostra apèna, le vol far le spìe,
par vedare se in giro ghè qualcuno

de quei che, da le prime foje zale,
pianze sul mondo dei ricordi cari.
Un peso che portèmo e no fa male,

insieme a visi e nomi a fassinari...
La ua in varèso ga dadrio le spale,
i pampani indorà dei so filari.