Sa bortadura in sardu de sa paraula italiana "tuta"

[Michele64]

Tuta da ginnastica = Canadesa o costùmene de zinnàstica.

Su pitzinnu meu est cuntentu mannu ca l'apo comporadu sa prima CANADESA.

Paritzas pessones in COSTÙMENE DE ZINNÀSTICA fiant currende in s'oru de su caminu.

Tuta da meccanico = Camusiu de mecànicu.

Su Robertu teniat su CAMUSIU prenu de mantzas a pustis de una die de traballu tostu.

Camice = Cansu.

A curtzu a sa ghenna de intrada de s'unidade de meighina, b'aiat tres mèigos in CANSU biancu.

Unu bonu fine de chida a totus - Miale.

[Perdu]

atura atentu, primu abàrrat sempri masculinu in sardu!
sa primu cosa
sa primu camisa....

[Michele64]

Finas custa, Pedru istimadu, est una chistione bastante cumplessa, e dia cherrer ponner in craru un'àtera bia chi pro mene non si devet dare tropu importu a chistiones individuales, creo chi sa presèntzia de opiniones diferentes siat petzi una richesa...

In onzi casu, eo personalmente preferzo a narrer "sa prima": si podet dare chi "sa primu" siat prus autenticamente sardu, ma sintzeramente no isco si una norma gasi tenzat medas possibilidades de si poder ispainare in sa limba currente.

Imbetzes, so totalmente de acordu subra de s'invariabilidade de s'azètivu "grandu", duncas si devet narrer "Sos grandu iscritores sardos".

Salude e trigu - Miale.

[Frantziscu]

Cumpartzo su chi narat Miale... babos meos, chi ant semper faeddadu sardu intre issos, impreant a su sòlitu "sa primu", ma in su matessi tempus si sapint de su fatu chi "sa prima" tenet prus possibilidades de esser atzetada comente espressione de una limba ufitziale...

Finas eo in s'iscritu impreo normalmente "sa prima"...

Saludos cordiales a Pedru e a Miale - Frantziscu.

[Aleri]

Sa kistioni est un'atra ancora!

forsis mancu "primu" (masculinu singulari) est sardu sintzillu sintzillu, ca su sistema de is arringheraus sardus est totu a "su de duus, su de tresi, su de cuatru..." e aici nendi.
Podit essi puru ki siat "primu" candu est açungidori e imbeças "primarju/primarzu" candu est a solu. Difatis "primarju" di naranta a su "primu" fillu ma forsis po atru puru (comenti su castillyanu "primero").

Comuncas no biu barrancus a umperai sempri sa forma a su masculinu ca seus feti sprikendi sa postura in d-unu arringheramentu e tandu primu cosa o prima cosa, primu cida o prima cida no mudat nudda.

a si biri

[Aleri]

comuncas torendu a su thread
CANADESA est su nòmini natzionali sardu!!!

(ancora is linguistas scimprendisi' po cumprendi de inibua ndi errìbat!)

[Michele64]

Aleri istimadu,

ti torro gràtzias pro s'interventu tuo, b'at meda de beru in su chi naras.

"Segundu" in cambiu de "su de duos" si podet finas atzetare a parrer meo, ma a pustis si devet narrer semper "su de tres", "su de bator", "su de chimbe", e gasi etotu.

In cantu a "primarzu", eo personalmente impreo s'espressione "fradile primarzu" comente bortadura de su tèrmine italianu "primo cugino".

Saludos e una bona domìniga - Miale.

[Perdu]

Originally posted by Michele64
Aleri istimadu,

ti torro gràtzias pro s'interventu tuo, b'at meda de beru in su chi naras.

"Segundu" in cambiu de "su de duos" si podet finas atzetare a parrer meo, ma a pustis si devet narrer semper "su de tres", "su de bator", "su de chimbe", e gasi etotu.

In cantu a "primarzu", eo personalmente impreo s'espressione "fradile primarzu" comente bortadura de su tèrmine italianu "primo cugino".

Saludos e una bona domìniga - Miale.

in sardu "primo cugino" est fradili carrali, duncas no d'at barrancu perunu

[Aleri]

Saludi o Miale,
ma "primo cugino" est "cugino di primo grado"?

deu connosçu fradili (I grado)
e 'ermannu (II grado)

[Michele64]

Sos ùrtimos messazos rapresentant un'àtera proa de cantu est rica e variada sa limba nostra...