Sos nùmenes de sas butegas in sardu

[Michele64]

Pro su chi pertocat su nùmene de sas diferentes butegas in sa limba nostra, in antis de totu dia cherrer poner in craru chi su sufissu "-eria" in zenerale no andat bene in sardu, ca est tìpicu de s'italianu.

Sa mezus solutzione, in su prus de sos casos, est a narrer sintzillamente "butega de...", pro esempru:

Macelleria = Butega de masellaju
Gioielleria = Butega de prendas o richìllias
Merceria = Butega de butones e vetas
Libreria = Butega de libros
Panetteria = Butega de cogones
Negozio di abbigliamento = Butega de bestires
Negozio di ferramenta = Butega de artìculos in ferru
Pelletteria = Butega de artìculos in pedde
Negozio di frutta e verdura = Butega de frùtora e ortalìtzia
Profumeria = Butega de profumu

Unu de sos pagos casos in ue su sufissu "-eria" si podet finas impreare est "pabireria" pro narrer "cartoleria".

Pro chi prendet sa bortadura de "edicola", a bisu meu "chioscu de ziornales" est seguramente mezus chi s'italianismu "edìcula".

Saludos a totus - Miale.

[Josto]

Sa buttega de macellaju fortzis est mellus a da tzerriai "buttega de carnitzeri".

[Aleri]

Stravanau ki ses o Miale!

Tòcat a sarvai perou "potecaria" puru ki , comenti s'aregu, 'olit nai "farmacia".

Un'atra cosa: est justu a tradusi totu, ma poita as lassau unu fueddu comenti a "artìculu"? No ti parit un'italianismu cuddu puru?

unu saludu

[Michele64]

Eja, sa paraula campidanesa "carnatzeri" si podet de seguru impreare in prus de su tèrmine logudoresu "masellaju".

Pro su chi pertocat "artìculu", creo chi Aleri tenzat resone; custu vocàbulu andat bene pro narrer "artìculu de ziornale", referidu a sas butegas est un'italianismu e duncas est mezus a impreare "produtu".

Cunfirmo chi "apotecaria" est prus sardu chi "farmatzia".

Sa pessone chi traballat in un'apotecaria, imbetzes, si devet mutire "apotecariu", siat si est un'òmine, siat si est una fèmina...

Salude e trigu - Miale.