Sena dudas, in custu perìodu sas prajas de s'ìsula nostra non parent esser medas seguras...

Unu fogu fuìdu a ora de sas tres de merie at creadu oras de ansiedade e timòria in sa zona de Santa Anna, chi s'agatat in sa costa de Budoni.

Sas framas ant destruìdu unas trinta ètaras de pinedu e mata mediterranea arribende a lingher sa praja e tzuchende chirru a su trighinzu de Portu Ainu.

Est istadu aplicadu deretu su pranu de emerzèntzia.

Sas iscuadras antifogu, arrimadas dae politzia e carabineris, ant fatu evacuare una parte de su trighinzu, cando chi àteros turistas sunt istados postos in preallarma.

Unos cantos turistas sunt abarrados uscrados in manera lèvia, cando chi una vetura s'est fata fumu.

Su fogu l'ant postu a suta de controllu petzi a merie tardu, ma b'at àpidu bisonzu de s'interventu de totu sos veìculos aèreos de s'aparatu rezionale.

Sas framas fiant a puntu de atacare su pinedu de Santa Anna, ma sunt istadas desviadas a s'ùrtima iscuta dae sos pompieris e dae sos boluntàrios.

Custu interventu providentziale at evitadu su peus: in cussu mamentu in su pinedu s'agataiant aparcadas deghinas de veturas de turistas chi fiant in arenas de mare.