TEMPI DURI PAI DISCOTECARI: ALE NOVE DE SERA TUTI IN LETO!


LE BRONSE QUERTE

Se prevede tenpi duri pai tosi discotecari. El ministro dele discoteche nol schersa: "Tute le "stàe da balo" gà da saràre massimo ale nove de sera e po' tuti in leto!". In sto modo se spera de incrementare anca le nassite. Me pare de sentire le racomandassiòn del pare al toso che porta fora la morosa a balere: "Me raccomando portare casa la tosa ale diese in punto!"; "Nol staga preocuparse, paròn, se no bato ciodo fra diese minuti a ze zà casa!" Ma no ze finìo qua: ze alo studio anca altri provedimenti par regolarizare la vita noturna. Tanto par scuminsiare, le cubiste gà da essare magre come maneghi de scòa, tre quatro talie in manco de quee de desso e questo, se capisse, ze par evitare le "curve pericolose". Dove che se fa musica dal vivo, podarà sonàre solo conplessi poco rumorosi e ze in arivo, anca parfìn, la novità del karaoke par sordomuti. Prima de entrare in sala da balo bisognerà assare zò le scarpe in guardaroba e 'ndare in pista con aposite patine de peltro. Nel caso de che i te ferma la stradale parchè te guidi inbriago spolpo, oltre al ritiro dela patente, la stradale te sbuzarà tute quatro le rode dela machina. Sarà introdoto el conceto del pari e dispari nele discoteche: nei giorni pari podarà andare a balare i masci e, nei giorni dispari, le femene. Par evitare le stragi del sabo de sera, le discoteche vegnarà verte tuti i giorni dela setimana escluso el sabo! Se le discoteche ga da saràre ale ventiuno anca tuti staltri locali: pub, birarie, ostarìe, bàcari, par la lege dela par condicio, gà da saràre ale ventidò. Fa ecessiòn alcune atività che invesse le se presta a prolungare l'orario anca par tuta la note tipo: le laterìe, i ufici postài e i feramenta. Secondo un sondaggio fato dal governo solo l'un percento no ze dacordo. La rilevassione ze sta fata su un canpion de popolassione matura con na età conpresa tra i 94 e i 107 ani e de zovani tra i 4 e i 8 ani.