NA ONTA E NA PONTA
SCUMINSIA LA SCOLA E SCUMINSIA 'NA SFILATA
LE BRONSE QUERTE

Quasi tuti scuminsia le scole, trane qua nel veneto, dove che, par via che i alberghi gà ciapà massa pochi schei sto istà, i gà ben pensà de prolungare le vacanse fin al venti de setenbre, come in Sicilia, cussì le fameje poe 'ndare al mare 'naltro fià par stropàre i busi dei comercianti. In verità le fameje le vorìa che la scola scuminsiasse el pì tardi possibile, par via che sto ano la sarà pì cara del soito. El primo giorno de scola ze come el giorno che se va in posta col 740: tra zainetti, diari, libri, traversòni, conputer, pene, matite, merendine, scarpe Ghe voe tre mutui par pagare tuto! Le fameje le ze drio pensare de rinunciare a calcossa. Cussì desso tuti serca case pì picole, par esempio, sensa la cusina e el gabineto. Ma non par rinunciare ale comodità, ma parchè co quèo che costa la vita e co queo che i te dà de stipendio la cusina e el gabineto noi serve pì: no se magna e no se caga! Comunque sto ano ghe ze la novità: parte la scola con la riforma Murati. E par fortuna che i dise che el fumo fa male! Na volta ghe gera 'na maestra ogni sinquanta aluni, desso invesse ogni quindese "bociasse" ghe ze: tre insegnanti, queo de sostegno, el psicologo, el tutòr, do-tre interpreti, un paro de preti, un vigile, un can, un gato, un pesse rosso che po' ala fine l'unico che fa calcossa, zè el bidèo! Ma eco che riva el primo giorno, davanti ai cancèi dela scola se presenta: uno coi blu jeans taconà e majeta meza manega, do metalàri coi cavèi driti inpomatà de gèlo pieni de ciòdi dapartuto, tre tosète travestìe da veline col bunigolo par fora e un bel tatuaggio sula ponta dele culate, sete oto fighetìni col majonsìn e la camizeta del'ultima colessione Benetòn autunno-inverno, scarpete de Prada, ociài de Armani, teefonìn Nokia, altri ancora coi caveji longhi fin sule spale tegnù su col cerchieto, la majeta del "Che" e la borsèta de sàco che fa tanto etnico. Me vien un dubio: "Scuminsia la scola o 'na sfilata?"