I poer fioeu de Gorla sessant’ann fa...

[Der Wehrwolf]

20 ottober 1944, 20 ottober 2004. I sentiment dei parent di piscinitt ch’in mort sota i bomb alleaa cambien minga: l’è arivaa el perdon cristian, ma nesun voer desmentegaa... Uno speciale ricordo in lingua milanese per una ferita ancora aperta nel cuore della gente

In quei temp là, in guerra, i ròbb je ciamaven anmò cont el sò nòmm. Inscì i incursion di aerei de sora di città eren bombardament, e minga raid. E i stragi de gent che la gh’entrava nient eren azion criminai e minga effett “secondari, collaterali”, come cunten sù in manera ipòcrita radio, television e giornai. Se femm on paragon tra i liber de stòria e i crònich del dì d’incoeu, l’è facil capì come i verità se perden semper pussee frequentement per la strada, sostituii da version preparaa per l’occasion, indove ai bon, probabil vincitor, se perdòna tusscòss, inveci ai cattiv, probabil perdent, se fann minga scunt. Anca a cost de giustificà e sminuì i frequent mazzament de civii che gh’aveven domà ona colpa, quella de trovass in del sit sbagliaa in del moment sbagliaa. Come i mòrt de Gòrla, straziaa dai bomb sganciaa in manera criminala senza on obiettiv precis, domà per svoià la stiva prima de tornà indree a la base.
Sessant’ann dòpo (1944 - 2004), el quarter de Gòrla, ch’el se troeuva sul vial Monza, che collega Milan a la Brianza, el piang anmò i sò vittim. Gh’è superstit scampaa ai maceri de la scòla rasada al soeul, gh’è parent, vesin de cà, amis che cunten su stòri pienn de straordinaria umanità, de solidarietà, de amor vegnuu foeura da l’òdi e dal sang innocent. Gent umil, popolana, che l’ha fermaa el temp, che la parla anmò el dialett milanes, che l’ha nò desmentegaa, che la voeur minga vendetta, che fòrsi, cristianament, l’ha anca perdonaa, ma che l’ha minga tajaa i radis cont el passaa.
L’atmosfera che la se respira a Gòrla, a dispett del temp volaa via, l’è anmò quella de on piccol mond antigh, faa de ròbb de ringhera e cors d’acqua, rizzad e campanitt, profumm d’incens e odor de cusina contadina. E in d’ona piazzetta gh’è anmò on coeur che batt, quell del Monument Ossari di Martir Piscinitt e di sò maester, tiraa sù, con gran sacrifizzi dai genitor che s’hinn tassaa appòsta, in del sit indove “Palazzo Marino” el voreva fà sù on cinema. Come la testimònia la sciora Elisa Zoppelli Rumi, che sòtta i maceri l’ha perduu duu fioeu: «El terren sgomberaa l’era staa mettuu in vendita dal Comun per ses milioni, allora semm andaa in piazza Scala e emm mettuu insèma on Comitaa». «Ma la vita di nòster fioeu la var donca inscì pòcch?» l’ha esclamaa el mè marì. E finalment el sindich Antonio Greppi, toccaa in di sentiment, l’ha dii: «Anca mì sont on papà... fí del terren quell che vorii». I danee, al princippi, hinn staa tiraa sù con la vendita di quadrei ricavaa dai macerii (da vun a duu franch, a seconda di condizion), con la vendita di buscioni de carta stagnoeula di bottili del latt e con tutti i privazion econòmich possibil del dòpoguerra. Poeu l’è rivada anca ona quai offerta sostanziosa, come el ferr vegg di fabbrich de azzal Falck e el marmor vanzaa da la Rinascente. El scultor Remo Brioschi l’ha domandaa domà on rimbors per i spes. La Scala e el Provveditor ai Studi hann faa la soa part. El 20 ottober 1947 la madrina Montagnani, benemerita, l’ha inauguraa el monument denanz a ona fòlla commòssa.
I responsabil del mazzament hann tentaa de fà trà giò la scòmoda testimonianza offrendo on badalucch de danee (se parla de on intervent del consolaa american), naturalment refudaa con disprezz.
E incoeu quella mama in lacrim cont el fiolett in di sò brasc l’è anmò lì, per fà riflett sui orror de la guerra, orror che a Gòrla s’hinn fonduu cont el frecass saturna di bombardier “alleaa“.

Leo Siegel

[Totila]

Ho postato un thread su Gorla sul Principale. I più incazzati non erano i forumisti di sinistra; ma guardacaso quelli della CdL.