EL COMPUTER SE COME EL MAS-CIO NO SE BUTA VIA GNENTE
LE BRONSE QUERTE

Vista la grave situassiòn economica, el Governo gà consilià, tute le casalinghe italiane, de vigilare; de tegnère de ocio i pressi, soratuto quei dela roba da magnàre e riferire diretamente al Presidente del Consiglio. Cussì la casalingà Noemi da Maserà, maridà co Espedito, autista del'Acap, co tre fioi in scala, che magna come un bataliòn dela folgore, la se gà subito messo al'opera. Tanto par scuminsiare la se gà studià el Sole ventiquatro ore par 'na setimana e, oltre a otenere 'na bèa abronzatura, la gà scoperto che l'inflassiòn ze solo che al 2,2 parsento. Invesse de doparare el giornàe al posto dela carta igienica, la ghe ga credùo, ansi, andando ancora pì a fondo, la gà scoperto che i pressi dei alimentari ze cressùi del 25 parsento mentre invesse, i prodotti tecnologici, i ze calà del 18 parsento! Alora, sicome la fameja tipo, la tira vanti solo col stipendio del marìo autista, e la fa senpre pì fadiga a rivàre, sensa patire la fame, ala fine del mese, la ga pensà de variare el menù, in base ale variassiòn dei pressi. Conferma par el primo e el secondo: el presso dela pasta ze fermo, e quelo dela carne de vaca mata o de polastro ala diossina ze adiritura in calo. Al posto dela fruta e dela verdura, che i ze aumentà del 50\%, la signora Noemi la gà pensà de conprare personal conputer, che invesse i ze calà del 18\%!. Magnàre prodoti tecnologici ze 'na esperienza sensa precedenti. Chi ze che magnarà più pomi dopo aver sajà un "Apple"? I te sazia sensa farte ingrassare. I PC veci i ze pì boni parchè i ze pì stagionà. E po' i ze anca afrodisiaci. Da quando che in fameja se magna solo che PC, pare che el marìo voja coneterse ogni sera coa mujere, el problema ze che, col magna modem ADSL el diventa un fià massa veloce nei raporti. Insoma el computer ze come el mas-cio: no se buta via gnente!