Is eletziones de Casteddu funt accabbadas e su risultau no s'est stesiàu da cussas chi fiant is previsiones:
po pagu chi siant, is votus donaus da is casteddaius a su Partidu Sardu, assumancu no funt stetius votus fuliaus.

S'unicu votu indipendentista utili po eligi unu patriotta in Cunsillu comunale fiat su votu a su PSdAz: cun 2.506 votus poneus unu cunsilleri, una patriotta indipendentista, progressista, internatzionalista, Claudia Zuncheddu, ghiadora (imbiaus is urtimus, ca hant essiri is preimus!) de sa lista PSdaZ, cun 451 votus de preferentza.

Aterus votus indipendentistas funt stetius fuliaus, po nexe de una lege elettorale traittora e liberticida chi hat cancellau prus de milli votus chi is casteddaius hant donau a G.F. Sollai e a F. Sedda.

S'aìna elettorale est una aìna a duas atzas, uno strumento a doppio taglio (po dda narri a s'italiana): candu si decidit de dd'usai po eligi calincunu patriotta chi portit aintru de is stitutziones is idealis e programmas nostus, est pretzisu tenne contu de is regulas iscrittas in sa lege elettorale, scioberende sa tattica giusta po arrennesciri.
Chini hat sceberau de curri a sa sola ddu sciriat ca haiat hai fuliau votus.
Cussus milli votus indipendentistas, postus impàri a is votus de su PSdAz, hiant essiri bastaus po eligi un'ateru cunsilleri indipendentista, fessat Sedda o Sollai... Podiant essiri duus, no unu!

A ita serbit su zero virgola de iRS e de SN?

A ita serbit su ghettai is cruppas a is casteddaius "tzeraccus", comente hant fattu in medas in su forum de iRS? (A propositu, si pongant de accordu Sale cun Sedda: Casteddu est sa capitale de sa Natzione Sarda o est sa "bagassa fenicia"?).

Candu is idealis nostus no intrant in su coro e in su sentidu de is sardus, sa nexe no est de is sardus, sa nexe est sa nosta.
No si podet narri un'orta ca su 60% de is sardus est (comente est berus!) po una Sardigna libera e un'atera orta narri ca is sardus funt tzeraccus poita no votant a prexere nostu. Sa nexe est féti sa nosta, poita no seus criende una alternativa crara...

Custu balit puru, antzis prima de totu, po su PSdAz!
Guai a nosus a essiri cuntentus pu cussu 3% e po s'eletzione de cussa balente patriotta chi est Claudia: si no fadeus luegu a torrai a ponne in pee unu Partidu organizzau po pode incungaiai percentuales elettorales a duas cifras, custa lege traittora hat a cancellai puru a nosus: bastat a biri su chi est capitau me is 6 "circoscritziones" de Casteddu, aundi (in base a is datus "ufficiosus") eligeus féti a Beppe Andreozzi asuba de 120 cunsilleris!

Custa lege elettorale andat cambiàda, comente andat cambiàda puru sa lege regionale (no féti po su "listinu") e massimamente sa lege po su parlamentu europeu, aundi si decidint s'80% de is politicas; (a propositu, in su 2007 si torrat a votai po is europeas, scideussinde po incarrerai torra sa batalla po su collegiu sardu!).
Est dovere de nosus militantes e dirigentes sardistas chi heus agiudau a nci curri a Berlusconi e is tzeraccus suus, ponne cun fortza a is partidus de sa manca italiana custu problema mannu, chi depit essiri una "pregiudiziale" po podiri cunfirmai s' "Unione" in is cumunus e in is provincias aundi guvernaus impàri.
Ateras pregiuditziales funt sa batalla po su dinai chi s'Italia si nd'est furende, contras sa tzeracchìa militare, su riconoscimentu de su "status" de insularidade e de minorìa limbistiga, e in finis su prus importante: su Statudu nou de soberanìa, chi siat finalmente "ruggito di leone", po prus scràmiu de pisittu, comente est custu becciu de su 1948 chi nosus sardistas no haeus mai agradéssiu, mai.

Ma po pode bogai atza cun is aterus partidus, serbit chi s'aìna nosta (su partidu nostu) portit "pitzu, atza, màniga e tolu", comente minescit unu progettu aici mannu: serbit luegu unu gruppu dirigente nou, ca custu chi teneus hat faddìu, puru po nexe de aterus partidus, "amigus" po finta.
Nosus cun cussus "amigus" seus in competitzione, ca s'obiettivu nostu est su ndeddis pigai is votus de chini s'intentit parte de sa "Manca Sarda" chi depeus fabricai.
Is fundamentas de cussu fabricu esistint già: su PSdAz a cui no bastat féti liberai sa Sardigna da su giuàle istrangiu, bolit puru liberai is sardus da su disispéru de sa poberesa, de s'emigratzione, po essiri populu soberànu cun pari dignidade politica, economica, sociale, culturale in d'una Europa de totus is populus, puru de cussus ancora chena Istadu.

Po totu custu meda chi abarrat de fairi, no nc'hat tempus po affestai is sardista eligius cunsilleris in Cateddu, Capuderra, Sarroch, Elmas, Pauli-Monserrato, Sìnnia, S. Andria Frius, Gesigu, Armungia e sindigus sardistas de Isili, Biddesatu, Barrali, ...
A issus e a nosus, bonu traballu e chi nos siat lébiu su biaxi, finas a sa libertade de su populu nostu.
No fadeus festa, però cussus votus nos donant coraggiu e gana bona po su caminu longu chi depeus fairi.

Fortza paris, sempre!