DOMA' NUNCH
Associazione econazionalista Insubre - Associazion econazionalista Insubra
www.eldraghbloeu.com

__________________________________________________ __________________________________

Per amor de la terra
Strenna per l'ann dòmila e vòtt del poetta Simon Milesi per i lettor de El Dragh Bloeu e tutt i nòst sòci.


Per amor de la terra,
ògni tant me domandi
se anca chì a Milan
a gh'è el ciel.

Allora a tiri sù i oeugg
in tra i antenn di grattaciel
e i tecc di cà.
A vardi el piomb negher
che chì a Milan ciamen ciel.

Stòmich e coeur se strengen
a catti foeura on tocchell de terra
per podè fiadà.
Ma la terra l’è per i can,
el Sempion per i drogaa.

E pensà che tra on quaj dì
l’è Nadal.
Tucc che corren
in di strad illuminaa.
Cent milla persònn
tutt in macchina per fà
quatter pass.

Un quaj coraggios in bicicletta
consciaa come on alber de Nadal
el par che'l va in miniera a lavorà.

I navili hinn secch,
el ciment el ven foeu'
di rubinett de cà.
Me manca el fiaa
chì a Milan.
A pensi a la Brianza
ai piant, ai ball de fen e
ai praa de cà.

Ma ahimè
Quej ch'hann ruvinaa Milan
hinn vegnuu anca chì
a fà dagn.
El formenton
l’è andaa via de cà
l’è staa sbattuu foeu' de la rotonda
e di quatter villett prefabbricaa.

Basta cemento !
Per l'amor de Dio
famm fiadà.
Netta el Lamber
e sbatt giò
i quatter cà.

La gent de l'Insubria
l’è bella
come la terra che gh’hann daa.
Ma se pò nò
conscialla de trà via
e daghela in man
ai forest
ch'hinn minga chi de cà.

Dessedes, Dragh Bloeu !
Comencia a sboffà
ché el ciment l’è dur
e 'l fa fadiga a brusà.