http://kuntrasug8.altervista.org/(traduzione in lingua italiana sul sito)


MANIFESTU POLITICU DE SU COMITADU CONTRA A SU G8 (SU DISTERRU)


MANIFESTU POLITICU DE SU COMITADU CONTRA A SU G8
Sa Sardigna est una nassione chena calincuna froma de sovranidade politica, economica, culturale. Ancora oe sa globalisassione corfet su populu sardu, mascamente in tres bessos:
1. Sa deculturassione, cun s’allontanamentu de sa limba sarda e de su connotu, oramai reduidos a fromas de folklore pro ispassiare e intrattennere sos turistas. A issos los cumbinchent a bennere a bidere custa zente istrana, chi faeddat una limba (o faeddu, comente la giamant issos) antiga, a mandigare polcrabu e a si ch’imbolare a modde in su mare nostru, fatende balanzare unu muntone’e inari a sos meres. Sos sardos, imbezes, mascamente cussos de sas “zitades tzivilizadas” si nde faghent sa birgonza de su chi abarrat de s’identitade nostra, trattada che alga’e muntonalzu.
2. Sa colonizassione economica, ligada a sa culturale, at tancadu sa janna a donzi possibile isvilupu de un’economia sarda “de manu nostra” e at dadu a su capitalismu italiarzu e internassionale piena libertade de si moere comente lis paret e lis piaghet. Nos ant abatidu s’economia tradissionale de tipu agro-pastorale pro no’che zaccare una de isfrutamentu chi corfet su logu e sas pessonas. In sos annos ’70 sas industrias petrolchimicas isfrutaiant sos tribagliadores sardos e los lassaiant a su destinu issoro de casciaintegratos, cun sa prezisa voluntade de ocidentalisare e bochire una cultura gara bia. Sos balanzos de sas furas in su logu sunt gitos a continente o in sas manos de sa classe compradora, gasi chi nudda potat essere imbestidu in dunu isvilupu sostenibile e ligadu a sas esizentzias de su populu sardu. Su chi nd’essit est un’economia theracca de s’italiana, chi est fatende a bisera totus sas siendas economicas nostras, comente sa produssione de sas caciaras, s’artejanadu, sas cooperativas agricolas e a bi la sighire. Custa situassione est gasi irraighinada chi, parte de sos sardos l’intendent comente naturale e chi no si potet vittire.
3. S’ocupassione militare, su pius giaru de sos medios impreados, ponet in su logu unu muntone’e carabineris, bases militares italianas, americanas, NATO e partiduras de esercitos de ateros istatos comente Israele, chi s’adrestant a sa gherra e isperimentant armas noas chi, tantas boltas, bochint pessonas etotu. Est s’assembru de s’arcipelagu de La Maddalena, cuntzedidu in su 1972 (chena peruna ratifica de parlamentu) a sa marina militare americana chi b’at postu una base de sutamarinos nucleares. La Maddalena representat bene s’istatu de sas cosas chi sos sardos devent supportare, ca est s’emblema de sa fura’e ispatzios, resurtzas, inare, chi nos corfet.
Pustis de 50 annos de lota, in su 2008 sa marina militare americana si nd’at a andare ma, a s’iscutta, s’istatu italianu (e sa theracca sua, sa regione autonoma) at aprontadu su seberu: su g8 e unu muntone’e zimentu de lussu chi colat. Sa matessi istoria a Quirra, Teulada e Capo Frasca, ue s’esercitu italianu e internassionale s’adrestat cun munissiones a s’uraniu impoberidu cajonende unu numeru disbarattadu de criaduras e bestiamene chi naschent isformados. Custu sempre chena irmentigare sos dannos a sa terra e s’impossibilidade de isvilupare calincuna economia, comente nos demonstrat s’istoria de sos piscadores de Teulada, chi lis ant cazadu su diritu a su tribagliu..
Custa est sa terra chi s’istatu italianu at seberadu che domo de su g8 in su 2009. Bisonzat de connoschere custa situatzione, fraighende una mobilitassione internassionale; est importante de torrare a nos ammentare chi su g8 no lu sunt fatende in Italia, lo sunt fatende in Sadigna, e nos cherent dare un atera iscutulada a bucca; no potimus abarrare mudos ancora. Zertu, sos moimentos ant a cuntestare su g8 e su cuntennidu de globalisassione e imperialismu chi gighet, ma, semus cumbintos chi, custas, potant abarrare paraulas boidas si no lis damus una cara e una realidade concreta.
Representantes Franzesos, Ghermanos, Americanos, Canadesos, Giaponesos, Russos, Inglesos ant a bennere ufficialmente a arrejonare de gherra contra a sa pobertade, a s’AIDS e a sa protessione de s’ambiente. Imbezes no si dezidit nudda, petzi si cunfrimmant puliticas de gherras fatas aterue.
Semus d’acordu cun custas criticas, ma est un ateru su contributu specificu chi cherimus batire. Medas de custos istatos repriment cun violentzia sas lotas de liberassione nassionale chi s’isvilupant in su logu issoro: Su Canada cun su Quebec, Sos americanos cun sos nieddos e sos indianos, s’Inghilterra cun sos Irlandesos, Scotzesos e Gallesos, sa Franza cun sos Corsicanos, Occitanos, Bretones e Bascos, sa Russia cun sos Cecenos, s’Italia cun sos Sardos. Cherimus chi sas mobilitassiones contra a su g8 de su 2009 appant unu significu in pius de sas semplitzes lotas contra a sas politicas neoliberistas de sa globalisassione. Sa nostra est un’appellascione a totus sos moimentos internassionales antimperialistas e anticapitalistas, e a totus sos moimentos chi gherrant in Europa e in su mundu pro li reconnoschere su diritu a s’autodizisione e sa sovranidade politica, economica, culturale.
Pro una fila’e rejones ligadas a s’occupadura italiana puru, sos sardos sunt unu de cussos populos corfidos dae su fenomenu de su disterru. Sunt resessidos a mantennere sas ligaduras cun sa terra issoro e no ant perdidu sas siendas culturales chi battiant. Lu proat sa naschida, in totu su mundu, de chentinaja di sotzius sardos, dae s’America a s’Australia a s’Italia. Est custa Sadigna disterrada, de unu milione e mesu de pessonas chi nos at fatu cumprendere sas potentzialidades mannas chi sos sardos disterrados potent aere in sa lota de liberassione nassionale e sotziale e pessamus chi custu g8 potat resessire che chentru de agregassione pro totus cussos sardos chi cherent parare custa atziada.
Gasi s’idea de faghere naschere in calincuna zitade italiana e perue sos disterrados sardos sient sos “sotzius de sos disterrados sardos contra a su g8”. Cussos ant su compitu de battire cuscientzia e collaborassione in sa mobilitassione contra a su g8 e de faghere connoschere sas rejones de sas lotas nostras a s’estèriu, gasi chi s’intumbu de sa chistione sarda potat bessire a campu .
Ischimus bene chi, in Sardigna, su g8 s’isvoligat donzi die e su tribagliu chi cherimus faghere no est s’approntadura de un’eventu mediaticu mannu ma unu biculu in sa lota nostra de liberassione nassionale e, pius in generale, in sa lota pro s’autodizisione de totas sas nassiones chena istatu.