de:
www.godotnews.com

Gina Farci

Aleni e su contu de unu nau de trigu
(Pinturas de Teresa Tinti)

Demos Editore, Casteddu, 2002





Custu libru d'anti pensau e fatu po is pipius, po dis contai su caminu ki fait unu nau de trigu finsas a bessiri pani. Funti binti pàginas a forma 'e A4, e is versus de su contu funti totus a arrima basada, scritus a mannu a mannu po dus podi ligi e imparai finsas is pipius prus piticus, una pariga 'e versus in dònnia pàgina, e a suta nci funt is pinturas ki sprìcant e abalòranta su ki nàrat su versu.

Is versus funti lestrus, deretus, crarus, ken''e pispisalla, ca est justu ki siant aici; is disinnus funti dilicaus ma sempri crarus acetotu, beni cumbinaus in totu is partis, ki is pipius nci podint agatai su ki nàrat su versu ma cosa in prus puru.

Est unu libru ki fueddus e pinturas funt is unus po is atras, ca s'afòrtiant a pari po scallentai is ligidoris, piticus o mannus ki sìanta. No ndi bessit unu libru sceti, no ndi bessit un'imbala-pipius o una poesia sceti, ndi bessit unu cuadru ki s'amànniat a pàgina a pustis 'e pàgina.

Is fueddus dus at scritus Gina Farci, maista in d-una scola 'e pipiesa de Cuartu S. Aleni, e is pinturas das at fatas Teresa Tinti, ki bivit in Cuartu issa puru, ki iat fatu jai atrus librus e disinnus po pipius, ki d'anti connota e apretziada in Continenti puru.

S'introdusidura d'at fata Antoni Lèpori, scriidori de fueddàrius e de gramàtigas de campidanesu e no-i sceti, ki si còntat su cunsideru po su sardu ki nci fiat in is iscolas corant'annus fait, e si sprìcat su cunsideru ki nc'est imoi, su ki funti fendi is maistas e su ki tòcat a sighit a fai.

Su libru est totu in campidanesu, sa presentada e s'introdusidura puru, totu scritu beni ken''e italianismus e a grafia autònoma, est a nai ca is sonus de su sardu funti scritus no cun is arrègulas de s'italianu, ca dus stròcinti, ma cun arrègulas agatadas a posta po su sardu, po dus incrarai, po dus abalorai, e po dus fai prus simplis, po kini su sardu est imparendiddu imoi e po kini du scit jai puru.

Su ki ndi bessit est unu sardu campidanesu friscu e lìmpiu ke s'akua 'e mitza, e custu tòcat a d'apretziai de prus ancoras pròpiu ca su libru s'arreferit a is pipius, est a nai a is personis ki funti su benidori de sa lìngua sarda, ca ki su sadru no est imparau imoi, beni, de is pipias e de is pipius, a intr''e cincuant'annus at'essi mortu jai, ca no nç'ant'essi prus personis bonas a du fueddai.

A faci de cust'abisonju, a sa bon'ora est bessiu custu libru, e a sa bon'ora cumèntzant a bessiri librus po pipius in campidanesu puru. E insaras donaus is norabonas a s'imprentadori, ki at obertu una cannaca de librus po pipius (ki custu ki seus narendi est su primu sceti), a maista Gina Farci e a totu is ki trabàllanta ke issa (e funti medas e de prus sempri), a Teresa Tinti sa disinnadora e a Antoni Lèpori ki s'est espressau de manera crara cument'a sempri.

Ma a primu 'e totus, donaus is norabonas a totu is pipias e is pipius sardus de oi, ki custu libru est po issus, po dus ajudai a connosci, a fueddai e a scriri su sardu cumenti dis spètat, po podi cresci de sa mellus manera.


Amos Cardia