¿Comente devimus risponder in su telèfonu in sardu?

[Michele64]

Eo zai naro "¿Prontu?" cando calicunu mi mutit e so seguru chi faeddat sardu, ma forsis est un'espressione tropu italianizada...

So incumintzende a pessare chi, s'incapas, diat esser mezus a impreare "¡Naret!"...

¿E pro bois ite si diat dever fagher, amigos istimados?

Saludos - Miale.

[Perdu]

Originally posted by Michele64
Eo zai naro "¿Prontu?" cando calicunu mi mutit e so seguru chi faeddat sardu, ma forsis est un'espressione tropu italianizada...

So incumintzende a pessare chi, s'incapas, diat esser mezus a impreare "¡Naret!"...

¿E pro bois ite si diat dever fagher, amigos istimados?

Saludos - Miale.

mhaaa....deu creu ki unu....saludi....iat a essi "dipromàtigu" e no cunfiantzosu cunfiantzosu
ma ki scieus ki est un'amigu pensu ki podeus nai:

oe'
nara
e insa'

[Michele64]

Gràtzias pro su messazu, Pedru istimadu...

Podent andare bene totu sas tres, mancari eo personalmente preferza sa segunda, mescamente in sa forma de cortesia "naret" comente apo propostu in su primu interventu meu subra de custu tema...

¿E s'espressione telèfonica "la linea è disturbata" comente la bortamus?

Est craru chi si diat poder narrer "b'at interferèntzias in sa lìnia", ma forsis b'at carchi cosa de prus inditadu...

Tene-ti contu - Miale.

[Josto]

Deu umperu su traditzionali e meda italianu "pronto!", ma in sa familla mia ddu est una persona, babbu miu, ca de calincunu annu s'est bofiu internatzionalizai cun dd'unu medachich"hallo!"
Una de is mellus frasias podit essi: chini est?/chie est?", opurus "saludi!/salude!".
In generali perou mi parit ca no siant potentivus che s'italiana "Pronto!".

[Aleri]

Saludi a totus

a su parri miu iat a depi essi, coment'at nau Perdu "eh, insa'!" cun is amigus (jai calincuna 'ia facu di aici deu);

po sighiri a Miale in sa forma de "cortesia" "naret!" eus a podi nai "nerit!" in Campidanesu.

"linea disturbata"?
"sa lìnia est mori mori!"

[Michele64]

Bos torro gràtzias a totus pro sos parreres bostros meda baliosos.

Como est lòzicu, b'at propostas diferentes e variadas, chi mèritant totus su matessi respetu e sa matessi dinnidade.

S'ùnica cosa segura est chi "pronto" no andat bene ca abarrat in onzi manera un'italianismu...

"Sa lìnia est mori mori" m'agradat meda...

"Eris sero Zorzu m'at telefonadu dae s'Austràlia, ma sa lìnia fiat MORI MORI e non s'intendiat belle nudda".

Pro su chi pertocat sos errores telèfonicos, si devet narrer "s'est isballiadu de nùmeru" e no "at isballiadu nùmeru", chi est unu calcu de s'italianu.

Eo creo chi si diat poder impreare finas "at marcadu male"...

Saludos e una bona die a totus - Miale.

[Frantziscu]

So de acordu subra de "¡Naret!", ma dia cherrer ponner in craru una cosa: custa paraula la devet pronuntziare petzi sa pessone mutida, cando chi su mutidore devet narrer "¡Intendat!".

Allò un'esempru de telefonada in sardu:

- ¡Naret!
- ¡Intendat! Dia cherrer faeddare cun Mariu Sanna.
- ¿A podides faeddare prus mannu? Sa lìnia est mori mori.
- Apo naradu chi dia cherrer faeddare cun Mariu Sanna.
- Mariu non b'est, at a torrare in una pariga de oras.
- De acordu, apo a torrare a mutire a ora de sas ses. Nare-li chi at telefonadu Miale Pinna.
- Andat bene, senno' Pinna, a mezus intender.
- ¡A mezus intender!