Una noa de s'ùrtima ora

[Michele64]

Custu contu (tristu meda) de s'ùrtima ora l'apo in pessu retzidu dae Miale Santu Pedru:

PÙLLIA - Bator zòvanos leados in petus* dae su trenu

Duos disacatos* idènticos sunt capitados in pagas oras e a pagos chilòmetros de distàntzia.

In Pùllia, sa fùria de duos trenos at segadu duas bidas zòvanas.

Custu manzanu, unu veìculu ferruviariu* at cotadu a suta* duas piseddas chi fiant rugrende sos binàrios a s'artària de unu passazu a livellu, a probe de Bari.

Sas duas adolessentes si fiant tremende deretu a pustis de su passazu de unu trenu e non si sunt abizadas chi un'àteru fiat transitende in sa lìnia.

Sas vìtimas non teniant documentos in dossu e duncas galu non las ant identificadas ufitzialmente, ma est praticamente seguru chi si tratet de duas sorres de 18 e 15 annos.

A ora de* sas oto de custu manzanu fiant andende a nche sizire* una tzia issoro chi las fiat isetende in su mare e, comente zai aiant fatu àteras bias, nch'ant brincadu a pee su passazu a livellu, chi teniat sas zagas* faladas, sena si sapire* ch'in cussu mamentu fiat arribende su veìculu ferruviariu chi las at leadas in petus.

In su logu de s'intzidente, sos babos si sunt intesos male e nche los ant zutos a su Policlìnicu.

Sas carenas de sas duas piseddas, iscorriadas* e de no poder reconnoscher, como s'agatant in s'Istitutu de Meighina Legale isetende su reconnoschimentu ufitziale.

In terra sunt abarradas petzi sas duas tascheddas*.

A de note est capitadu un'àteru episodiu tràzicu, semper in Pùllia, ma custa bia in su de Brindisi: àteros duos piseddos sunt mortos cotados a suta dae unu trenu in sa bidda de Tuturano.

Fiant sas ùndighi a deghe de sa sero cando sos duos zòvanos, de 16 e 17 annos, sunt istados cotados a suta dae un'Eurostar cando fiant in sa motighedda* issoro.

Su ghiadore de su veìculu ferruviariu, chi fiat moidu dae Roma pro andare a Lecce, at contadu chi at intesu unu retumbu* forte e chi pro custa resone at arressadu sa cursa de su trenu.

Ma de sos duos piseddos abarraiat meda pagu: petzi sa motighedda issoro, cando chi sas carenas fiant istadas ghetadas prus a largu e nche fiant fertas* in una pèntuma*.

Leare in petus = travolgere, investire
Disacatu = sciagura, tragedia
Veìculu ferruviariu = treno, convoglio
Cotare a suta = leare in petus
A ora de = (temporale) verso; a ora de sas chimbe = verso le cinque
Sizire = raggiungere
Zaga = sbarra
Si sapire = s'abizare
Iscorriadu = straziato
Taschedda = zainetto
Motighedda = motorino
Retumbu = botto, boato
Nche ferrer in = finire in
Pèntuma = scarpata

¡Amigos, cuidadu cando rugramus unu caminu de ferru! Sa bida est petzi una...

Saludos cordiales a totus - Miale.

[Frantziscu]

Non b'at duda chi si devat tenner cuidadu, a dolu mannu ischimus chi sos caminos de ferros italianos a s'ispissu non cumbidant sas cunditziones de seguràntzia chi diant esser netzessàrias...

¿"Pèntuma"? No apo intesu mai custa paraula, inoghe in Làconi amus semper naradu "trema".

Saludos e unu bonu agabu de chida - Frantziscu.

[Michele64]

A pustis de su disacatu duplu capitadu custu manzanu in terra pulliesa, sos caminos de ferru natzionales ant anuntziadu chi sos 6.500 passazos a livellu chi b'at pagu prus o mancu in su territoriu italianu ant a esser sustituìdos cun passazos elevados e passazos suterràneos...

Custa mi paret un'idea meda bona e isperamus chi la ponzant in pràtica su prus luego chi si podet...

Sende gasi, mancari est tristu a lu dever narrer, in sos duos disacatos de oe sa neghe la tenent petzi sos piseddos, chi ant chircadu de rugrare sos binàrios in s'ìnteri chi sas zagas fiant in zosso...

A dolu mannu, custu avesu malu est ispainadu in sa mesudie italiana e finas in s'ìsula nostra... a pitzinnu lu faghia finas eo a bias e como mi sapo de cantu fia istùpidu e incussiente...

Frantziscu tenet resone: sa bida est petzi una e non la devimus isperdissiare gasi...

[Frantziscu]

Eo imbetzes b'apo proadu petzi una bia, cando tenia ses annos e fia zoghende cun sos amigos meos...

Mama mea m'aiat trilliadu bene e dae tando non l'apo fatu prus... pro bonaùra mea...