El resta sempre curto e dispetoso,
pien de giornate grise e misteriose:
a volte un cielo limpido e ventoso,
e altre volte a nuvole rognose.

Giornate bastardà de vento e piova,
che va a stravento anche par dispeto,
e dopo ancòra el belo ghe riprova,
ma resta sempre un fredo maledeto.

San Valentin - a mezo de la strada -
porta medaje e cuchi sonarini
co qualche sagra fiaca de contrada.

La tera sempre piena de lustrini,
impasta tuto dentro na giassada:
trìbola ancòra i veci e i picenini.