Preghiera in milanes

[Il Patriota]

L'è `na preghiera fada in milanes
con umiltà, fervor, senza pretes:
te preghi Madonnina, per on'ora
fa ritornà Milan `me l'era allora...
e, per quell'ora, famm vedè i navili,
i bei tosann coi sòcch fin'ai cavili,
i "Gigi" con la gnaccia e intorna i fioeu
e sentì anmò el cantà di barchiroeu,
el vosattà di dònn in sul Verzee
e quell del Vicolin di lavandee!
O Madonnina, famm `sta carità.
per on'oretta sola famm tornà
ne la Milan di brumm e di cavai
quand sòtta tì giugavom num bagaj,
e Te parevet alta in Paradis
coi gulli intorna, bianch come benis,
famm rivedè `ncamò i spazzacamin
con tutta la carisna sul faccin...
el soo... l'è `na preghiera disperada...
d'on coeur che ne pò pù de sta bugada...
ma... quand de damm a trà Te avree decis...
famm sarà i oeucc... e derva el Paradis.

[Dreyer]

l'è un po trista...specialment el final...però l'è vera!

'me l'era bela la Milàn d'ona volta... serum pusseee pover, ma g'avevum la speranza de fa', de cred in un quaicos olter ai danè...

mah...