Pro non irmenticare

…si sono tuncanne sos ocros, …ido solu ervas siccas e sole, intenno abba chi mi abbassat in cara
…como est in lavras…ma abba no est …est sambene

sambene meu?...o de s’ebba?...o de su cumpanzu chi juchiapo a costazzu?o de ambas tres mesturatu a su sudore e a sa terra?

est caentu …caentu metta…ma appo vrittu, sos ocros de s’ebba m’abbaitana , ma parene ocros chi non iden prus, intenno su coro meu chi curret…allonghio su brazzu…e sa manu li tocat su coro…e su coro suo… su coro mannu… su coro chi curriat impare a su meu…non curret prus

..non curret prus in sos montes, non curret prus in sas piana, non curret in sa rena de sos rivos e nemmancu in cussa de su mare, non curret in s’abba durche e nemmancu in sa salita, non curret s’utta s’abba chi proete dae chelu, non curret in sutta sos isteddos e sa luna, non curret in su nive, non curret in sutta de sos unnos , non brincat sos aitos ne in sas crujuras, non curret prus in sa carena de Sardigna

cantu vias m’as sarvatu sa vita?...cantas vitas di deppo ?
…is una gherrera e non ti tiraias a secus canno gherraiamos chin sos chentos inimicos chi inoche sono colatos

is galana e canno ti estiapo sos grillos pro sas festas ti piaghiat …ca zente e caddos ti abbaitaiat

cantas dies e notte impare, cantas vias ca solu ippo, ti aeddaipo, so cumbintu chi mi cumprennias, ca macari non faeddaias, chin sos ocros mi risponnias

…su coro tuo non curret prus…e su meu ses firmanne

…si mi sono tuncanne sos ocros…provo a los abberrere, …ido caddos, zente… a terra e sambene, sambene metta…terra ifusta de sambene e de sudore de zente e de animales, sambene chi intrat in sas venas de s’abba e chi leat a mare
…e poi nudda.

Abbejo sos ocros, itti unu sonniu malu chi appo istu, o itti de carchi atteru?...o itti cosa vera? so sutta unu chercu…e abbaito su campu , ervas siccas sole e ventu, ventu caente
tuncu unu pacu sos ocros e ido zente e caddos a cantos, terra ifusta de sambene e gurtuglioso a tunnu…los torro a abberrere ….timo a los tuncare , custu non est unu sonniu, custu cosa b’est istata
abberu, intenno sas oches de sa zente e de sos animales, oches in limba mea e oches in limbas de attere, metta limbas istranzas…una sa nostra

s’arziat su ventu , est unu ventu chi paret enit da innedda o dae su coro…e ido unu caddu currenne cantu a isse e a goroppa un’omine.