Riconosimento de la Lengoa Veneta - ajornamento

[DVD (POL)]

Go on ajornamento inportante sol Riconosimento Rejonale de la Lengoa Veneta.

Pa chi che no savése:

- riconósare na lengoa vol dire tutelarla, difóndarla, insegnarla e donca tegnérla viva
- ghe xe 2 tipi de riconosimenti par le lengoe: o te vien riconosuda la lengoa dal parlamento italian (xe riconosude l'albanexe, el catalan, el furlan, el sardo e tante altre) o te la riconose la to Rejon
- da qualche ano come asociasion culturali co in testa Raixe Venete semo drio dimandar co forsa che la rejon del Veneto la riconósa la lengoa veneta come lengoa uficiale - in parte de l'italian
- 2 provìnce (Vicensa e Trevixo) le ga votà nel 2005 dimandando uficialmente a la nostra Rejon de riconósare e de uficialixare el veneto come lengoa regionale
- altre rejon le ga xa riconosudo lengoe cofà par exenpio el furlan, el lasiale, el piemontexe
- de solito (vd. in Sardegna, Piemonte, Lasio, ...) xe stà le forse politiche de sinistra a darse da fare par riconósare le lengoe locali
- la proposta de riconosimento del veneto cofà lengoa xe pasà a l'inisio de sto ano in comision cultura in rejon, dèso xe ferma la proposta in Consejo Rejonale

ULTIMI AJORNAMENTI: ghemo savudo propio ieri che la stimana che vien in Consejo Rejonale se tacarà la discusion del riconosimento de la nostra lengoa veneta.
Ghemo da far sentir la nostra voxe e pretenderere che oviamente el veneto vegna riconosudo come lengoa e che el voto poxitivo posibilmente el sia trasversale da drita (destra) e sanca (sinistra).

Ve tegneremo informà, intanto ve invitemo a parlar e far presion soi partiti che votè e a mandar létare ai jornali.

Ghe xe la posibilità de fàrghela.

Pasaparola!

[Luis Molina]

Tuto beo e zusto tosi de Raixe, o quasi.
Ve desmenteghè che no ga senso far ricognossare, e insegnare inte'e scole, na lengoa inte'e condission de'a nostra.
Prima cogna rivitalisarla, farla ritornare granda e prestigiosa, creando na academia de'a lengoa veneta che la agiorna la nostra lengoa parché se possa parlare co ela de tuto, sensa dover 'ndare in prestio dal talian.
E dopo se podarà dimandare el ricognossimento regionae, e l'insegnamento inte le scole.

- riconósare na lengoa vol dire tutelarla, difóndarla, insegnarla e donca tegnérla viva

Tutelare na lengoa voe dire salvarla da la talianisassion, che la xe na conseguensa mortae de 140 ani de ocupassion taliana de'a tera veneta.
Difondare la lengoa? Quale, quea che parlemo desso? Fadiga sprecà.
Insegnarla? Quale, quea che se dopara desso inte'a tera veneta? Spreco de schei.
Tegnerla viva? Tegnere viva la lengoa che vien parlà desso dai veneti xe come tegner in vita artificialmente par ani e ani un omo deventà un vegetae.
Prima, co na academia che la rivitalisa, se fa tornare granda e prestigiosa la lengoa, e dopo se podarà passare al so ricognossimento, a la so difusion, al so insegnamento.