Caro Veneto....

[peronimarco]

Caro Veneto,

£e divixion fra i veneti £e xe storeghe. Ghe xe varie raxon de sto
fato, anca storeghe.

Par mi ghe xe na natura dei veneti, che sicome i xe dotai de un ta£ento e de na storia, i xe boni imprenditori, bravi comercianti, artisti unici, grandi £avoradori, parché i xe in conpetision l'un co l'altro, ma i xe anca dei barufoni speso par gnente.

Semo rivai a aver barufe anca pa £e monade, ma anca su robe inportanti co'l rixultà de no rivar a gnente, come £a scritura veneta.

Ma la barufa xe na arma de chi no vo£ la union.

In po£itica, co cue£o che rende na carega, £e divixion e el farghe £e scarpe anca ai amisi xe na prasi che ga rovinà el sentimento de£a xente pa i autonomisti, sensa gnanca un rixultato. De£e volte £e divixion £e xe sta anca necesarie pa inpedirghe a çerti de far dei dani, ma el pì de£e volte le divixion xe el rixultà de£a smania de potere che ga çerti personaji. Insoma ghemo avudo so£o po£itici inuti£i o al masimo al servisio del foresto.

Xe ora de invertir sto proceso se no se vo£ restar senpre pì in pochi e inuti£i. Fra un fià esare veneti sarà un problema psico£ogico, parché finche noaltri barufemo, ai nostri veneti i ghe cava anca el ricordo de esar£o. Fra un fià esare veneti vorà dire esare disadatai!

Bixogna invertir el proceso, scumisiando da fora de£a po£itica dei
partiti, parché i partiti no xe na roba che come veneti ghemo mai vudo, e no semo boni de dopararli cofà i altri popo£i (tiro£esi, sardi, ecc)

Dato che £e elesion italiane £e xe trucae e cue£e venete £e xe sospexe dal ocupante, bixogna far n'altra roba che no sia £a organixasion de un partito. Podemo far anca cue£o, ma intanto se po£ far n'altra roba pì uti£e.

Tanti parla de "far cultura", e so d'acordo, ma mi penso che bixogna comuncue anca crear qualcosa de novo.

Cosa? Un raprexentante internasional dei veneti

Bixogna crear na raprexentansa dei veneti che £a se prexenta al mondo come la raprexentansa de£e xenti venete de nasiona£ità.

Basta anca na persona so£a, ma riconosua dai veneti.

Noaltri veneti, de tutti i co£ori e de tuti i partiti, tuti anca el
çitadin veneto rexidente soto altro stato ocupante, gavevo da unirse par nominar sto raprexentante. Diretamente sensa mediasion del foresto.

Se scumisia col dire, mi so veneto, de nasiona£ità, sinò no se po£
votar.

Xa aver na anagrafe dei veneti xe un paso. Ghe ne xe xa 2 de anagrafe, ma podemo farghene 1 nova e magari co £a fuxion de £e altre 2 vecie.

Fata l'anagrafe bixogna elexere un raprexentante dei veneti, che el saria un specie de Doge. Dixemo un Cao.

Pa far cosa? £o deciderà i veneti che se riunirà inte sto consejio dei veneti.

Sto Cao podarà pa exenpio dimandar el riconosimento de£a £engua veneta, co cue£a autorità che no po£ aver un po£iticante de pasajo eleto dai italiani: un po£iticante eleto co sistema talian no raprexenta i
veneti!

Sto Cao el podarà, se ghe demo un fià de schei, farse vedare a cualche incontro internasiona£ pa far vedare che i veneti i existe e i xe boni de organixarse da so£i almanco un raprexentante internasiona£ , sensa pasar pa £e elesion trucae (da senpre) del stato ocupante.

Anca parché sto raprexentante ga da raprexentar tuti i veneti anca cue£i in volta pa'l mondo.

Se te si veneto e te vo£ unirte ai veneti pa votar el Cao, rispondi!

Te prego, comunque, de mandarghe sta email ai veneti che te conosi, anca se no te condividi sta idea. Par piaxer.

Loris

[pensiero]

starebbe bene su "parliamo la nostra lingua"