In su giassu "firmiamo.it", apo postu una dimanda a su guvernu sardu Torràdenos s'istòria nostra. A chie cheret est cumbidadu a lu firmare. Si podet dare chi non nos ascurtent, ma si non faveddamus, craru chi non nos intendent.
A su guvernu sardu
Nos ant imparadu belle totu de
sos fenitzos in Sardigna,
sos pùnicos in Sardigna,
sos romanos in Sardigna,
sos gregos in Sardigna,
sos vàndalos in Sardigna,
sos pisanos in Sardigna,
sos genovesos in Sardigna,
sos cadalanos in Sardigna,
sos ispannolos in Sardigna,
sos Savoias in Sardigna,
sos italianos in Sardigna.
Semus galu isetende chi nos imparent s'istòria de sos sardos in Sardigna. Amus a isetare galu tempus meda si ponimus afigu in su bonu coro de s'Istadu e in sa virtude autonomista de sa Regione.
Pro custu, cun custa firmas cherimus:
- s'istòria de sa Sardigna siat matèria de òbligu in totu sas iscolas sardas;
- su guvernu de sos benes culturales sardos torret a sa Sardigna;
- sa subrintendèntzia archeològica cuncordet cun su guvernu sardu sos iscavos de fàghere, punnende a connòschere totu su chi si podet de sa tziviltade sarda dae s'antigòriu prus inedda a sos tempos prus reghentes.