Sa litera V

[Josto]

Deu de una pariga'e mesis ddui hapu bogau sa litera V candu iscriu in Sardu a pustis chi Perdu mi hiat corrìgiu una'ia chi hia iscritu su fueddu Ventana.
Immoi seu biendi chi custa litera dda umperais totus.
Mi ddu spricais beni chi sa V s'umperat e chi eja candu s'umperat e candu nono?
Medas gratzias.

[Perdu]

Originally posted by Josto
Deu de una pariga'e mesis ddui hapu bogau sa litera V candu iscriu in Sardu a pustis chi Perdu mi hiat corrìgiu una'ia chi hia iscritu su fueddu Ventana.
Immoi seu biendi chi custa litera dda umperais totus.
Mi ddu spricais beni chi sa V s'umperat e chi eja candu s'umperat e candu nono?
Medas gratzias.

sa lìtera V in su cumentzu de is fueddus no est una cosa sarda, difatis is fueddus ki in latinu fianta cun sa V su sardu dus at furriaus a B.

vida=bida (finsas a candu d'eus furriau a vida de unus cantu 'e annus)

vinia=binja

vinum=binu

ventana est una faddina, ca sa pronùntzia de sa F a pustis de s'artìculu est V:

sa farra (pronùntzia sa varra)
sa fentana (pro. sa ventana)

[Josto]

Originally posted by Perdu
sa lìtera V in su cumentzu de is fueddus no est una cosa sarda, difatis is fueddus ki in latinu fianta cun sa V su sardu dus at furriaus a B.

vida=bida (finsas a candu d'eus furriau a vida de unus cantu 'e annus)

vinia=binja

vinum=binu

ventana est una faddina, ca sa pronùntzia de sa F a pustis de s'artìculu est V:

sa farra (pronùntzia sa varra)
sa fentana (pro. sa ventana)

E sa B invecis de sa F (sa Bentana) andat beni su propriu?

E in prus hap'a bolli sciri chi sa V a intru de sa paraula est faddina poita deu dd'hapu bogada de donnia logu.

[Perdu]

Originally posted by Josto
E sa B invecis de sa F (sa Bentana) andat beni su propriu?

E in prus hap'a bolli sciri chi sa V a intru de sa paraula est faddina poita deu dd'hapu bogada de donnia logu.

bivi, e cun custu fueddu t'apu nau totu!

[Michele64]

squadra volante della polizia = iscuadra boladora de sa politzia

[Perdu]

Originally posted by Michele64
squadra volante della polizia = iscuadra boladora de sa politzia

volante=boladori
verus=berus

is baroniesus sceti nanta su vinu, sa vidda....ca issus no anti mudau sa V.

p.s
la ki su sardu du tenit unu fueddu po nai polizia, est polima!

[Michele64]

Cumprendo, ma eo personalmente preferzo a impreare "politzia", chi est una paraula internatzionale utilizada dae belle totu sas limbas... est su matessi arresonu de "telèfonu/faeddatesu"... "pòlima" l'impreo in sentidu brullanu o peorativu...

Nche nos devimus fuìre, ca sa PÒLIMA ischit in ue semus = dobbiamo scappare perché gli sbirri sanno dove siamo

Saludos - Miale.

[Cristianu]

Deu iscriu VENTANA ma scìu de fadhinài poitta sa paraula sintzilla est FENTANA. Iscrìu ainci poitta sa pronuncia est cun sa V e mi bennit ispostangiu fai ainci. BENTANA no mi parit bonu.
Cristianu

[Michele64]

Bentanedda = "finestrino" e finas "sportello" ("isportellu", prefertu dae sa Papiros, est in realidade un'italianismu feu a beru).

"Apo comporadu sos billetes in sa BENTANEDDA".

[su stori]

Originally posted by Perdu
... ventana est una faddina, ca sa pronùntzia de sa F a pustis de s'artìculu est V

sa farra (pronùntzia sa varra)
sa fentana (pro. sa ventana)

No tèngiu ainas teòricas po cuntestai su chi ses narendi Perdu, però a mei m'iant imparau una règula pratica.
Po is fueddus chi a su singolari e cun s'articulu aranti, si pronùnciant cun sa V, cumenti

sa varra
sa vesta
sa ventana
sa vuntana
su vapori
su verbali
sa vigu

aranti 'e su fueddu chi bolis biri chi incumèntzada cun sa F o cun sa V (e giai innoi s'amitit chi si nd'agatant) poninci sa prepositzioni IN e ascurta cumenti sònada cun sa F e cun sa V

in varra sonat mali, duncas e' farra
in vesta sonat mali, duncas e' festa
in ventana sonat beni, duncas e' ventana
in vuntana sonat mali, duncas e' funtana
in vapori sonat beni, duncas e' vapori
in verbali sonat beni, duncas e' verbali
in vigu sonat mali, duncas e' figu

Torr'a nai, no bollu intrai in chistionis chi no potzu aguantai a livellu teòricu, però in is ditzionàrius puru is fueddus cun sa V (ventana puru) doi funti.
Certu custa règula esti "a sonu" e is origas no funti totu 'gualis ..

saludi
su stori