¡Bivat su sardu!

[Frantziscu]

Amigos istimados,

apo in pessu agatadu custu forum bostru e so meda cuntentu a beru.

Est craru chi m'agradat mescamente su fatu ch'inoghe s'iscriat meda in sardu.

So assolutamente de acordu cun sos chi atrogant chi sos addòvios in ue si faeddat petzi in italianu e si faghent petzi tzarras e tzertos non servint a nudda, pro mene s'ùnica cosa importante est a arresonare efetivamente in sardu e a lu fagher su prus a s'ispissu possìbile.

¡Unu saludu a totu bois e bivat sa limba sarda!

Frantziscu Fulghesu - Làconi (NU).

[Michele64]

¡Bene bènnidu a su forum nostru, Frantziscu!

Làconi est una bidda meda bella, bi so istadu paritzas bias e tenzo bastantes amigos in ie.

¿Comente est chi ses postende dae Paderno Dugnano?

¿Sordadadu in cue as?

Isco chi cussa bidda a probe de Milanu tenet medas cuarteris...

[Frantziscu]

¡Salude a tie, Miale!

¿Tue de ue ses? So bidende ch'istas in Reggio Emilia (una tzitade cun medas ispàtzios birdes ma cun unu clima tropu afocosu pro mene), ma suponzo chi finas tue tenzas orìzines sardas. ¿No est su beru?

No, no apo sordadadu in Paderno Dugnano (in ue b'at paritzos cuarteris comente naras tue), isto inoghe dae bìndighi annos, mi so indotoradu in limbas istranzas in Milanu, a pustis mi so cojuadu cun una cumpanza mea de bidda (fiamus zai amorende cando semus bènnidos a inoghe) e semus abarrados in sa zona de sa capitale lombarda, ma a Làconi bi torramus duas bias s'annu a su nessi.

Saludos de coro - Frantziscu.

[Michele64]

"Indotoradu" m'agradat meda... a bisu meu, est de seguru mezus chi "laureadu", chi est un'italianismu evidente... de su restu, finas in friulanu si narat "indotorâ"...

Saludos - Miale.

[Aleri]

Beni 'enniu o Frantziscu!


ma da potzu sciri una cosa?
ma poita totu is laconesus ki biu scriri, scrinti in logudoresu? Scaresçus?

(nosu de su gulfu de Atràntidi seus stètius sempri unu pagu malus... )

comuncas, mancai ki as sceberau de scriri de custa manera, su de importu est a scriri in sardu!

[Frantziscu]

Tenes resone, Aleri, su faeddu laconesu est bastante de transitzione.

Su fatu est chi eo iscrio su sardu petzi dae unos cantos annos a oe e, leghende a s'ispissu sas publicatziones (libros e revistas) de sa sotziedade editoriale Papiros, mi so avesadu prus a su logudoresu.

In onzi casu, creo chi dia poder iscrier finas in campidanesu, faghende prus faddinas est craru...

Saludos - Frantziscu.

[Perdu]

saludi e beni bènniu o Frantziscu!!!
mi fait praxeri meda ki custu forum est su prus sardu de totu is forum de custu jassu!
seus fueddendi totus in sardu, ta cosa spantosa e bella!!!!!

[Aleri]

podis crei o Frantziscu, no di fait nudda, mi parit ki si cumprendeus su pròpiu!

Imbeças po Perdu di nau ki custu parit ki siat s'UNICU FORUM IN LIMBA SARDA DE SU MUNDU!!

[Frantziscu]

A dolu mannu su chi naras est beru, Aleri istimadu, sa limba nostra s'impreat meda pagu in Internet, e sa neghe pro custu la tenent finas sos tzarradores (semper in italianu, est craru)...

Torremus gràtzias a su chelu chi nois semus pessones chi preferint sas atziones a sas tzarras...

E, si sighimus a operare, podemos esser seguros chi sos ispàtzios Internet in ue s'arresonat in sardu ant a aumentare...

Saludos - Frantziscu.